🔒Открыть пост
и посмотреть медиа
и посмотреть медиа
အမေရိကန်စစ်သား ငါးထောင်အတွက် ပတ္တယားက အသင့်ရှိဟု မြို့တော်ဝန် ပြော
ဧရာဝတီ၊ ဩဂုတ် ၂၆၊ ၂၀၂၆
အရှေ့အလယ်ပိုင်းဒေသတွင် ၉လကျော် တာဝန်ထမ်းဆောင်ခဲ့ပြီးနောက် လာမည့်အပတ် ထိုင်းနိုင်ငံသို့ ဝင်ရောက်မည်ဟု မျှော်လင့်ရသည့် USS Abraham Lincoln လေယာဉ်တင်သင်္ဘောအုပ်စုမှ အမေရိကန် ရေတပ်သားများနှင့် ရေကြောင်းရန် ကာကွယ်ရေး တပ်ဖွဲ့ဝင် ၅၀၀၀ ခန့်ကို ကြိုဆိုရန် ပတ္တယားမြို့က ပြင်ဆင်လျက်ရှိကြောင်း ထိုင်းသတင်းများတွင် ဖော်ပြသည်။
ထိုင်းတာဝန်ရှိသူများ၏ ထုတ်ပြန်ချက်အရ တပ်ဖွဲ့ဝင် ၅,၀၀၀ နီးပါး တင်ဆောင်လာသည့် စစ်သင်္ဘော ၃ စီးပါ အဆိုပါအုပ်စုသည် စက်တင်ဘာလ ၂ ရက်မှ ၆ ရက်နေ့အထိ လမ်ချဘမ်း ဆိပ်ကမ်းသို့ ဆိုက်ကပ်ရန် လျာထားကြောင်း သိရသည်။
ခရီးစဉ်သည် တပ်ဖွဲ့ဝင်များ ခေတ္တနားခို အနားယူရန်နှင့် သင်္ဘောများအတွက် ရိက္ခာအထောက်အပံ့များ ဖြည့်တင်းရန် အတွက်သာ ဖြစ်ပြီး၊ ထိုင်းနိုင်ငံနှင့် ပူးပေါင်းစစ်ရေးလေ့ကျင့်မည် မဟုတ်ကြောင်း ထိုင်းရေတပ်က ပြောထားသည်။
တာဝန်ထမ်းဆောင်ချိန် ရှည်ကြာခဲ့ပြီးနောက် အပန်းဖြေစခန်းမြို့ဖြစ်သော ပတ္တယားတွင် လာရောက်နားခို အနားယူကြမည့် အမေရိကန် စစ်သည်များကို ကြိုဆိုရန် မြို့တော်အနေဖြင့် အသင့်ဖြစ်နေပြီဟု ပတ္တယားမြို့တော်ဝန် Poramet Ngampichet ကလည်း ပြောသည်။
ယခင်ကလည်း အမေရိကန် စစ်သင်္ဘောများ ထိုင်းနိုင်ငံ အရှေ့ဘက် ကမ်းရိုးတန်းသို့ လာရောက်ချိန်တွင် ပတ္တယားမြို့မှ အမေရိကန် စစ်သည်များကို ကြိုဆိုခဲ့ဖူးကြောင်း ၎င်းက ဆိုသည်။
စစ်သည်တဦးလျှင် ဘတ် ၁,၀၀၀ မှ ၃,၀၀၀ အထိ သုံးစွဲမည်ဟု ခန့်မှန်းတွက်ချက်မှုအပေါ် အခြေခံ၍ တပ်ဖွဲ့ဝင် ၅,၀၀၀ စလုံး ကမ်းပေါ်တက်ခွင့်ရပြီး ပတ္တယားတွင် သုံးစွဲခဲ့ပါက ဒေသတွင်း သုံးစွဲမှု ဘတ် ၅ သန်းမှ ၁၅ သန်းအထိ ထွက်ပေါ်လာနိုင်မည်ဟု ခန့်မှန်းထားသည်။
