Azərbaycan Cüdo Federasiyası - официальный дзюдо

Beynəlxalq Cüdo Federasiyası (BCF) Akademiyasının cüdo məşqçiliyi üzrə 150-ci sertifikat proqramının rəsmi açılış mərasimi keçirilib. Mərasimdə çıxış edən rəsmilər cüdoda təhsilin və peşəkar məşqçi hazırlığının əhəmiyyətindən danışıblar. BCF Akademiyasının tədris proqramlarının mütəxəssislərin peşəkar inkişafına, qabaqcıl beynəlxalq təcrübənin Azərbaycanda tətbiqinə və ölkədə cüdonun inkişafına töhfə verdiyi vurğulanıb. Qeyd olunub ki, bu cür proqramların davamlı təşkili Azərbaycan cüdosunun inkişaf strategiyasının mühüm istiqamətlərindən biri olan müasir yanaşmalara yiyələnmiş yeni nəsil məşqçilərin hazırlanmasına xidmət edir.

Avqustun 10-da Bakıda Beynəlxalq Cüdo Federasiyası (BCF) Akademiyasının cüdo məşqçiliyi üzrə sertifikat proqramına start verilib. Azərbaycan Cüdo Federasiyası və Milli Olimpiya Komitəsinin birgə təşkilatçılığı ilə keçirilən proqramda ümumilikdə 62 məşqçi iştirak edir. Onlardan 39-u Azərbaycanı, digər iştirakçılar isə Hindistan, Tacikistan, Cibuti, Niderland, Finlandiya, ABŞ və Rusiyanı təmsil edir. Proqram çərçivəsində nəzərdə tutulan seminarlar BCF Akademiyasının ekspertləri tərəfindən keçirilir. Təlimlər zamanı iştirakçılara cüdo məşqçiliyinin müxtəlif istiqamətləri üzrə nəzəri və praktiki biliklər təqdim olunur. Proqramı uğurla başa vuran məşqçilər BCF Akademiyasının beynəlxalq sertifikatı ilə təltif ediləcəklər. Bakıdakı proqram BCF Akademiyasının 10 illik fəaliyyəti ərzində təşkil olunan 150-ci sertifikat proqramı olması ilə xüsusi əhəmiyyət daşıyır. Azərbaycan indiyədək BCF Akademiyasının 6 sertifikat proqramına ev sahibliyi edib.