Ferghana Turismo - Turismo Oficial

Farg‘ona viloyatida Qirg‘iz Respublikasining Batken viloyatidan tashrif buyurgan jurnalistlar, blogerlar va ommaviy axborot vositalari vakillari ishtirokida “Info-tur” tashkil etildi. Mazkur tashrifdan ko‘zlangan asosiy maqsad — ikki qo‘shni hudud o‘rtasida axborot va media sohasidagi hamkorlikni yanada mustahkamlash, Farg‘ona viloyatining boy turistik salohiyati, tarixiy-madaniy merosi hamda zamonaviy sayyohlik imkoniyatlarini keng targ‘ib qilishdan iborat. Ijodiy guruhni Farg‘ona viloyati hokimligi hamda viloyat Turizm boshqarmasi vakillari hamrohlik qilib, Farg‘ona va Batken viloyatlari o‘rtasidagi do‘stona va yaqin qo‘shnichilik aloqalari, turizm, madaniyat va axborot sohalaridagi hamkorlik istiqbollari xususida fikr almashildi. Tashrif davomida mehmonlar Farg‘ona viloyatining diqqatga sazovor turistik obyektlari bilan yaqindan tanishib, hududning o‘ziga xos tarixi, milliy qadriyatlari, me’moriy obidalari, hunarmandchilik an’analari va sayyohlik infratuzilmasi haqida batafsil ma’lumotlarga ega bo‘ldilar. Farg‘ona zaminidagi tarix, bugungi taraqqiyot va betakror tabiat uyg‘unligi xorijlik mehmonlarda katta taassurot qoldirishi shubhasiz. Zero, bunday info-turlar nafaqat hududning turistik jozibadorligini keng namoyon etish, balki xalqlarimiz o‘rtasidagi do‘stlik, yaxshi qo‘shnichilik va o‘zaro hamkorlik rishtalarini yanada mustahkamlashga xizmat qiladi.