Myanmar Hard Talk - новости Мьянмы

လေးမျက်နှာရေဘေးအခြေအနေ တဖြည်းဖြည်းတိုးတက်၊ ဆက်သွယ်ရေးဝန်ဆောင်မှု ၃၅ ရာခိုင်နှုန်း ပြန်လည်ရရှိ 𝙈𝙃𝙏𝙉𝙀𝙒𝙎《𝘼𝙐𝙂～𝟕》 ဧရာဝတီတိုင်းဒေသကြီး လေးမျက်နှာမြို့နယ်တွင် ငဝန်ရေကာတာ တာတမံနိမ့်ကျပျက်စီးမှုကြောင့် ဖြစ်ပေါ်ခဲ့သည့် ရေဘေးအခြေအနေမှာ တဖြည်းဖြည်း ပြန်လည်ကောင်းမွန်လာနေပြီး မြို့ပေါ်ရပ်ကွက်များရှိ ရေများလည်း ကျဆင်းလာကာ ဆက်သွယ်ရေးဝန်ဆောင်မှုများ၏ ၃၅ ရာခိုင်နှုန်းခန့်ကို ပြန်လည်အသုံးပြုနိုင်ပြီဖြစ်ကြောင်း သိရသည်။ လက်ရှိတွင် မြို့နယ်အတွင်းရှိ မိုဘိုင်းဆက်သွယ်ရေးစခန်း ၁၃ ခုအနက် ရေဘေးကြောင့် ယာယီဖြုတ်သိမ်းထားသည့် စခန်း ၆ ခုနှင့် Hub Site ထိခိုက်မှုကြောင့် ဆက်သွယ်မှုပြတ်တောက်ခဲ့သည့် စခန်း ၆ ခုရှိခဲ့သော်လည်း နင်းကြမ်း၊ ကျတ်ကွင်းနှင့် ယင်းဆယ်ကျေးရွာတို့ရှိ စခန်း ၃ ခုကို ပြန်လည်ချိတ်ဆက်နိုင်ခဲ့ပြီး ခမောက်စုကျေးရွာစခန်းမှာလည်း ပုံမှန်ဝန်ဆောင်မှုပေးလျက်ရှိကြောင်း သိရသည်။ ထို့ပြင် စာရေးကွင်းကျေးရွာ ရေဘေးကွပ်ကဲရေးရုံးတွင် Cell on Wheel (COW) မိုဘိုင်းစခန်းတပ်ဆင်ထားပြီး B2B Satellite Terminal များကို စာရေးကွင်းနှင့် ဆိတ်နို့ကုန်းကျေးရွာရှိ ရေဘေးကယ်ဆယ်ရေးစခန်းများတွင် တပ်ဆင်ကာ အရေးပေါ်ဆက်သွယ်ရေးဝန်ဆောင်မှုများကို ဆောင်ရွက်ပေးလျက်ရှိသည်။ ရေဘေးအခြေအနေအရ လေးမျက်နှာမြို့ရှိ အနိမ့်ပိုင်းနှင့် အမြင့်ပိုင်းရပ်ကွက်များတွင် ရေပြန်လည်ကျဆင်းနေပြီး ဩဂုတ် ၆ ရက် ညနေ ၆ နာရီမှ ဩဂုတ် ၇ ရက် နံနက် ၆ နာရီအထိ ၁၂ နာရီအတွင်း အနိမ့်ပိုင်းရပ်ကွက် (၅) ခုနှင့် အမြင့်ပိုင်းရပ်ကွက် (၃) ခုတို့တွင် ရေမှတ် ၀ ဒသမ ၂ ပေစီ လျော့ကျခဲ့ကြောင်း သိရသည်။ ရေဘေးသင့်ပြည်သူများအတွက် ကူညီကယ်ဆယ်ရေးနှင့် ထောက်ပံ့ရေးလုပ်ငန်းများကိုလည်း ဆက်လက်ဆောင်ရွက်လျက်ရှိရာ ဩဂုတ် ၇ ရက်အထိ လူဦးရေ ၄၀,၀၀၀ ကျော်အား အခြေခံစားသောက်ကုန်များနှင့် ဆန်ရိက္ခာများ ထောက်ပံ့ပေးခဲ့ပြီး စုစုပေါင်း ထောက်ပံ့ငွေမှာ ကျပ် ၁၄၆ ဒသမ ၆၇၆ သန်းကျော်ရှိပြီဖြစ်ကြောင်း သိရသည်။ ထို့အပြင် မြို့အုပ်ချုပ်ရေးမှူးများနှင့် ရပ်ကွက်အုပ်ချုပ်ရေးမှူးများက ရေဝင်ရောက်မှုနှင့် ဘေးအန္တရာယ်အခြေအနေများကို အနီးကပ်စောင့်ကြည့်လျက်ရှိပြီး ရေဘေးစိုးရိမ်ရမှုအခြေအနေများမှာလည်း တဖြည်းဖြည်း လျော့နည်းလာနေကြောင်း သိရသည်။