🔒Открыть пост
и посмотреть медиа
и посмотреть медиа
Pərvin Əliyev: “İxtisas seçimi həyatınızın istiqamətini müəyyən edən qərarlardan biridir”
“Tələbə Təhsil Mərkəzi” şirkətinin təsisçisi, elm və təhsil eksperti Pərvin Əliyev 12–19 avqust tarixlərində keçiriləcək ixtisas seçimi ilə bağlı abituriyent və valideynlərə müraciət edib.
Pərvin Əliyev bildirib ki, abituriyentlər üçün uzun və yorucu bir hazırlıq mərhələsinin ən həyəcanlı günləri artıq başlayır:
“Əziz abituriyentlər, ilk növbədə hər birinizi bu günə gəlib çatdığınız üçün təbrik edirəm. Qarşınızda duran bu seçim sadəcə bir universitetə qəbul olmaqdan ibarət deyil. Bu, gələcək həyatınızın istiqamətini müəyyənləşdirəcək mühüm qərarlardan biridir. 11 il ərzində çəkdiyiniz zəhməti, imtahana hazırlaşdığınız günləri, yuxusuz gecələri və qurduğunuz xəyalları bir anlıq qərara qurban verməyin.”
Ekspert abituriyentlərə seçim zamanı ən vacib məqamın özlərini tanımaq olduğunu vurğulayıb:
“İxtisas seçərkən ilk növbədə özünüzə sual verin: Mən nəyi bacarıram, hansı sahəyə marağım var və gələcəkdə özümü harada görürəm? Təkcə dostunuz həmin ixtisası seçir deyə, valideyniniz istəyir deyə və ya hansısa ixtisas hazırda daha prestijli görünür deyə seçim etməyin. Unutmayın ki, universitetdə həmin ixtisası oxuyacaq və gələcəkdə o sahədə işləyəcək şəxs sizsiniz.”
Pərvin Əliyev qeyd edib ki, yalnız keçid balına və universitetin adına baxmaq düzgün seçim üçün kifayət etmir:
“İxtisasın adını görüb qərar verməyin. Həmin ixtisasda hansı fənlərin tədris olunduğunu, məzun olduqdan sonra hansı istiqamətlərdə işləyə biləcəyinizi, əmək bazarında perspektivini, təhsil haqqını və digər imkanları əvvəlcədən araşdırın. Eyni zamanda yalnız bir ilin keçid balına əsaslanaraq bütün gələcəyinizi planlaşdırmayın. Seçimlərinizi real və düşünülmüş şəkildə formalaşdırın.”
Ekspert valideynlərə də səslənərək onların bu prosesdə əsas rolunun övladlarına istiqamət göstərmək olduğunu bildirib:
“Valideynlərdən xahişim budur ki, övladlarının yerinə seçim etməsinlər. ‘Filankəsin uşağı burada oxuyur’, ‘bu ixtisas daha yaxşıdır’ və ya ‘mütləq bu universitetə getməlisən’ yanaşması ilə qərar vermək doğru deyil. Övladınızı dinləyin, onun istəyini və bacarığını nəzərə alın. Bəzən uşağın seçdiyi ixtisas valideynin düşündüyündən tamamilə fərqli ola bilər, amma həmin seçim onun üçün daha doğru seçim ola bilər.”
Pərvin Əliyev abituriyentlərə seçim zamanı emosiyaya qapılmamağı və qərarı tələsmədən verməyi tövsiyə edib:
“Bu gün sosial şəbəkələrdə müxtəlif fikirlər, proqnozlar və tövsiyələr görəcəksiniz. Hər deyilənə inanmayın. Məlumatı mümkün qədər rəsmi və etibarlı mənbələrdən əldə edin. Kimsə ‘bu ixtisas mütləq düşəcək’, digəri isə ‘bu ixtisası heç kim yazmasın’ deyə bilər. Amma sizin üçün əsas olan başqasının fikri yox, öz nəticəniz, istəyiniz və real imkanlarınızdır.”
Ekspert sonda abituriyentlərə motivasiya xarakterli müraciət edib:
“Əziz abituriyentlər, siz artıq ən çətin mərhələlərdən birini keçmisiniz. İndi özünüzə inanmağın, sakit olmağın və zəhmətinizə güvənməyin vaxtıdır. Əgər bu günə qədər bacarmısınızsa, bundan sonrakı mərhələnin də öhdəsindən gələcəksiniz. Özünüzə ‘bacaracağammı?’ sualını deyil, ‘mən bunu necə daha düzgün edəcəyəm?’ sualını verin.
Unutmayın, bir imtahan nəticəsi sizin kim olduğunuzu müəyyən etmir. Bir ixtisasa qəbul olmaq həyatdakı bütün uğurların son nöqtəsi deyil, yeni başlanğıcdır. Qarşınızda hələ çox böyük imkanlar var. Əsas odur ki, seçiminizi düşünərək edin və sonradan ‘kaş ki’ deməyəsiniz.
Sizə ürəkdən uğurlar arzulayıram. Ümid edirəm ki, 12–19 avqust tarixlərində hər biriniz illərdir qurduğunuz xəyallara bir addım daha yaxınlaşacaqsınız. Siz bu günə qədər əlinizdən gələni etmisiniz, indi isə özünüzə inanmağın vaxtıdır."
