Мандалай Тин Гью - новости Мьянмы

ပုသိမ်ကြီးမြို့နယ်၊ အုန်းချောကျေးရွာရှိ သာမဏေကျော်ကျောင်းတိုက်၌ အစာအဆိပ်သင့်မှုဖြစ်ပွား Aug 26, 1:20 PM ယနေ့ ဩဂုတ်၂၆ရက်၊ နေ့လယ်ပိုင်းက မန္တလေးတိုင်းဒေသကြီး၊ ပုသိမ်ကြီးမြို့နယ်၊ အုန်းချောကျေးရွာရှိ ပေါက်စိမ်းသာမဏေကျော်ကျောင်း၌ အစာအဆိပ်သင့်မှုဖြစ်ပွားခဲ့ကြောင်း မြန်မာနိုင်ငံလူမှုကယ်ဆယ်ရေးအဖွဲ့ (မန္တလေး)မှ သိရသည်။ အဆိုပါ သတင်းအရ နယ်မြေခံ (စေတနာမွန်အသင်း အုန်းချော)နှင့်အတူ မြန်မာနိုင်ငံ လူမှုကယ်ဆယ်ရေးအဖွဲ့ (မန္တလေးတိုင်းရုံး)၏ ပုသိမ်ကြီးမြို့နယ် ချမ်းမြသာစည်မြို့ရုံး၊ ချမ်းအေးသာစံမြို့ရုံး၊ အောင်မြေသာဇံမြို့နယ်အဖွဲ့များ မှ လူနာတင်ယာဉ်များဖြင့် သွားရောက် ကူညီလျက်ရှိပါသည်။ မန္တလေးဆေးရုံကြီးတွင် အပါး၃၀(မစိုးရိမ်ရ)၊ ကျောက်မီးတိုက်နယ်ဆေးရုံတွင် ၄၆ပါး(မစိုးရိမ်ရ)တို့ တက်ရောက်ကုသမှုခံယူလျက်ရှိပြီး သက်ဆိုင်ရာ ပြည်သူ့ကျန်းမာရေးဦးစီးဌာနများ၏ လမ်းညွှန်မှုဖြင့် ပူးပေါင်းဆောင်ရွက်လျက်ရှိကြောင်း သိရသည်။ မှတ်ချက် ဓာတ်ပုံများရပါက edit လုပ်၍ ဖော်ပြပေးပါမည်။ #မန္တလေးသတင်းကွန်ရက် #အုန်းချော #အစာအဆိပ်သင့်

ထာဝရမိသားစုမှ မွေးနေ့အထိမ်းအမှတ် ငွေကျပ်သိန်းတရာကို မဟာလူမှုကယ်ဆယ်ရေးအဖွဲ့သို့ လှူဒါန်း Aug 25, 12:35 PM ဝဏ္ဏကျော်ထင်သီရိပျံချီဦးမောင်ကိုနှင့် ဇနီး အဂ္ဂမဟာသီရိသုဓမ္မသိင်္ဂီဒေါ်ရွှေဥ (ထာဝရမိသားစု)မှ အဂ္ဂမဟာသီရိသုဓမ္မသိင်္ဂီဒေါ်ရွှေဥ၏ မွေးနေ့အထိမ်းအမှတ် ကုသိုလ်တော်အဖြစ် မဟာ လူမှုကယ်ဆယ်ရေးအဖွဲ့သို့ လိုအပ်သည့်နေရာများတွင် အသုံးပြုရန်အတွက် အလှူတော်ငွေ သိန်း(၁၀၀)ကျပ်တိတိကို ယနေ့ ဩဂုတ် ၂၅ရက် နံနက်ပိုင်းက လှူဒါန်းခဲ့ကြောင်း သိရသည်။ အဆိုပါ လှူဒါန်းပေးအပ်မှုကို မဟာလူမှုကယ်ဆယ်ရေးအဖွဲ့ အလုပ်အမှုဆောင်အဖွဲ့၏ နာယက ဦးမျိုးဝင်းအောင်(ရှမ်းရွှေတောင်)၊ ဥက္ကဌ ဒေါက်တာသက်ထွန်းဝင်း(ခ)ကိုသက်ကြီးနှင့် အဖွဲ့ဝင်များက လက်ခံရယူပြီး ဂုဏ်ပြုလွှာအား ပြန်လည်ပေးအပ်ခဲ့သည်။ ဝဏ္ဏကျော်ထင်သီရိပျံချီ ဦးမောင်ကို အနေဖြင့် အဖွဲ့ဝင်များကိုလည်း ဂုဏ်ပြုအားပေးစကားများ ချီးမြှင့်ပြောကြားခဲ့ပါသည်။ #မန္တလေးသတင်းကွန်ရက် #မွေးနေ့ #ပရဟိတ #အလှူ

မန္တလေး ကားနံပါတ်ပြား ပျောက်ဆုံးခြင်းအတွက် အကူအညီတောင်းခံခြင်း Aug 21, 2:34 PM Kia Sportage ဩဂုတ်လ ၂၀ ရက်နေ့ ညပိုင်း အပြင်သွားရင်း လမ်းမှာ ရေထဲမောင်းမိပြီး ကားနံပါတ်ပြား ပြုတ်ကျကျန်ခဲ့ပါတယ်။ နံပါတ်ပြား — YGN 41 / 1T-4554 လမ်းတလျှောက်မှာ တွေ့ရှိထားသူများ၊ သိရှိသူများရှိရင် အောက်ပါဖုန်းနံပါတ်ကို ဆက်သွယ်ပြီး ကူညီအကြောင်းကြားပေးကြပါဦးဗျာ။ 09 770 878 852 ယခုပို့စ်ကို တွေ့ရှိပါက မျှဝေပေးခြင်းဖြင့်လည်း ကူညီပေးကြပါဦးဗျာ။ ကျေးဇူးအထူးတင်ပါတယ်။ #မန္တလေးသတင်းကွန်ရက် #ကား #နံပါတ်ပြား

ယနေ့ည မန္တလေးမြို့ဝန်းကျင်ပေါ် သိပ်သည်းဆမြင့် တိမ်တိုက်ကြီးများကြောင့် မိုးကြိုးပစ်ခြင်းနှင့် မိုးသည်းထန်ခြင်းတို့ကို သတိပြုရန်လို Aug 20, 8:43 PM မန္တလေးမြို့ဝန်းကျင်အပါအဝင် မိတ္ထီလာ၊ ညောင်ဦး၊ မုံရွာ၊ မကွေး၊ ထီးလင်း ဒေသများပေါ်တွင် အပူချိန်အလွန်နိမ့်ကျသော သိပ်သည်းဆမြင့် မုန်တိုင်းတိမ်တိုက်ကြီးများ အားကောင်းစွာ ဖြစ်ထွန်းလျက်ရှိသဖြင့် ပြင်းထန်သော မိုးကြိုးမုန်တိုင်းများနှင့်အတူ သည်းထန်စွာ မိုးရွာသွန်းခြင်း၊ မိုးသီးကြွေခြင်းများနှင့် လေပြင်းတိုက်ခတ်ခြင်းများကို သတိပြုရန်လိုအပါကြောင်း နိုင်ငံတကာမိုးလေဝသစောင့်ကြည့်သူ ဆရာဝင်းနိုင်က ယနေ့ ဩဂုတ် ၂၀ရက် ည၈နာရီကျော်အချိန် လူမှုကွန်ရက်မှတဆင့် ရေးသားထားသည်။ လာမည့်နာရီပိုင်းအတွင်း မိုးကြိုးပစ်ခတ်နိုင်ခြေ အလွန်မြင့်မားသဖြင့် ဟင်းလင်းပြင် သို့မဟုတ် သစ်ပင်ကြီးများ၊ လျှပ်စစ်ဓာတ်တိုင်များအနီး လှုပ်ရှားသွားလာခြင်းမှ ရှောင်ကြဉ်သင့်ကြောင်း ဆိုပါသည်။ ထို့ပြင် မိုးကြိုးတိမ်တိုက်မှ တိုက်ရိုက်ဆင်းသက်လာသော မြေပြင်လေပြင်းကြောင့် အဆောက်အအုံ၊ အမိုးအကာ၊ သစ်ပင်နှင့် သွပ်မိုးများ လွင့်ပါးပျက်စီးနိုင်သလို ခဏတာအတွင်း မိုးသည်းထန်စွာ ရွာသွန်းနိုင်၍ မြေနိမ့်ပိုင်းများတွင် ခေတ္တရေကြီးရေလျှံခြင်း သို့မဟုတ် ချောင်းရေ မြင့်တက်ခြင်းများ ရုတ်တရက် ဖြစ်ပေါ်နိုင်ကြောင်း သိရသည်။ သို့ဖြစ်၍ လာမည့်နာရီပိုင်းတွင် အိမ်ပြင်ထွက်သွားလာခြင်းများကို တတ်နိုင်သမျှ ရှောင်ကြဉ်ပြီး ဘေးကင်းသော လုံခြုံသည့် အဆောက်အအုံများအတွင်း၌သာ နေထိုင်ကြပါရန် ဆရာဝင်းနိုင်က ရေးသား သတိပေးထားသည်ကို တွေ့ရသည်။ မန္တလေးမြို့တွင် ယနေ့ဩဂုတ် ၂၀ရက် ညနေ၆နာရီအချိန်မှစတင်ကာ မိုးသည်းထန်စွာရွာသွန်းခြင်း၊ လျှပ်စီးလက်ခြင်း၊ မိုးကြိုးပစ်ခြင်းများ ဖြစ်ပွားမှုရှိခဲ့သည်။ #မန္တလေးသတင်းကွန်ရက် #မိုး #မိုးကြိုး photo credit : ဆရာဝင်းနိုင်

မြေကွက်ရောင်း၍ ရေဘေးသင့်ပြည်သူများကို ကျပ်သိန်းငါးရာ လှူဒါန်းမည်ဟု ဆို Aug 7, 7:25 PM ဧရာဝတီတိုင်းဒေသကြီးအတွင်း ကြုံတွေ့နေရသည့် ရေဘေးအတွက် ကူညီထောက်ပံ့ရန် မန္တလေးတိုင်းဒေသကြီး၊ ညောင်ဦးမြို့နယ်ရှိ မြေကွက်ကိုရောင်းချမည်ဖြစ်ကာ ရောင်းရငွေထဲမှ ငွေကျပ်သိန်းငါးရာကို လှူဒါန်းမည်ဖြစ်ကြောင်း မန္တလေးမြို့၊ ယဉ်ကျေးစံ(ခ)ရွှေပြည်ကြီး အိမ်ခြံမြေဝန်ဆောင်မှုလုပ်ငန်းမှ မမိုးသက်ဝေက ပြောသည်။ “ရေဘေးသင့်လို့ ဒုက္ခရောက်နေကြတဲ့သူတွေအတွက် အလွန်ပဲစိတ်မကောင်းဖြစ်ရတယ်။ ဒါပေမယ့် ကျမလက်ထဲမှာ ငွေမရှိသေးတာမို့ ညောင်ဦးမှာရှိနေတဲ့ ကျမရဲ့ မြေကွက် ၁ ဧက ဒဿမ ၄၄ ကို ကျပ်သိန်းသုံးထောင်နဲ့ ရောင်းချင်တယ်။ ကျပ်သိန်း၁၀၀၀ကို အရင်ပေးပြီး ကျန်ငွေကို ၅ လဆိုင်းဖြစ်ဖြစ် ၁၀ လဆိုင်းဖြစ်ဖြစ် ရောင်းပေးမယ်။ ကျပ်သိန် ၁,၀၀၀ ကို အရင်ရရင်ပဲ ကျမအနေနဲ့ ရေဘေးဒုက္ခသည်များကို ကျပ်သိန်း ၅၀၀ လှူချင်ပါတယ်ရှင့်”ဟု ၎င်းကဆိုပါသည်။ ယခုရောင်းချမည့်မြေကွက်နှင့်အတူ ၄ဒဿမ၄၁ဧက၊ ၂ဧက မြေကွက်တို့လည်း ရောင်းချရန်ရှိပြီး ဟိုတယ်ပါမစ် ၃၀(ခ) ကျပြီးသည့် မြေများဖြစ်သည်။ တူရင်းတောင်နှင့် မျက်နှာချင်းဆိုင်၊ ဦးစိုးမြင့် ဟိုတယ်အလုံး၁၀၀ အနီးတွင်တည်ရှိကာ အမည်ပေါက် စာရွက်စာတမ်းအပြည့်အစုံရှိသည်။ ကျန်မြေကွက်များပါ ရောင်းချပြီးပါက ကိုယ်အင်္ဂါမသန်စွမ်းသူများအတွက် ဆေးရုံနှင့် မျက်စိဆေးခန်း တည်ဆောက်လှူဒါန်းဖို့လည်း ရည်မှန်းထားကြောင်း မမိုးသက်ဝေက ပြောသည်။ ယဉ်ကျေးစံ(ခ)ရွှေပြည်ကြီး အိမ်ခြံမြေဝန်ဆောင်မှုလုပ်ငန်းသို့ ဆက်သွယ်နိုင်သည့် ဖုန်းနံပါတ်မှာ 09 881 290 047,09 425 314 710 ဖြစ်သည်။ #မန္တလေးသတင်းကွန်ရက် #ရေဘေး #အလှူ #မြေ