The Irrawaddy - новости Бирмы

ဖမ်းဆီးခံရတဲ့ ဆရာတော် ပလဖ လက်ထဲ ပျံလွန် (ရုပ်/သံ) ဧရာဝတီ၊ ဩဂုတ် ၂၆၊ ၂၀၂၆ စစ်ကိုင်းတိုင်း၊ ချောင်းဦးမြို့နယ် ရွှေဒါးကျကျေးရွာက ကျောင်းထိုင်ဆရာတော် အရှင် ဣန္ဒာစာရ ကို ချောင်းဦးမြို့နယ် ပြည်သူ့လုံခြုံရေးနဲ့ ပြည်သူ့ကာကွယ်ရေး အဖွဲ့တွေက ဖမ်းဆီးသွားပြီးနောက် ဒဏ်ရာတွေနဲ့ ပျံလွန်တော်မူခဲ့တယ်လို့ မြေပြင်မှာရှိနေတဲ့ သတင်းရင်းမြစ်တွေဆီက သိရပါတယ်။ ဒါ့အပြင် အမျိုးသမီးတဦးအပါအဝင် ဒေသခံ ခုနစ်ဦးလည်း ဖမ်းဆီးခံထားရဆဲဖြစ်တယ်လို့ ဒေသခံတွေက ဧရာဝတီကို ပြောပါတယ်။ Ссылка скрыта #မြန်မာ #ဧရာဝတီ #စစ်ကိုင်း #ချောင်းဦး #ပလဖ #ပကဖ #WhatsHappensInMyanmar

အမေရိကန်စစ်သား ငါးထောင်အတွက် ပတ္တယားက အသင့်ရှိဟု မြို့တော်ဝန် ပြော ဧရာဝတီ၊ ဩဂုတ် ၂၆၊ ၂၀၂၆ အရှေ့အလယ်ပိုင်းဒေသတွင် ၉လကျော် တာဝန်ထမ်းဆောင်ခဲ့ပြီးနောက် လာမည့်အပတ် ထိုင်းနိုင်ငံသို့ ဝင်ရောက်မည်ဟု မျှော်လင့်ရသည့် USS Abraham Lincoln လေယာဉ်တင်သင်္ဘောအုပ်စုမှ အမေရိကန် ရေတပ်သားများနှင့် ရေကြောင်းရန် ကာကွယ်ရေး တပ်ဖွဲ့ဝင် ၅၀၀၀ ခန့်ကို ကြိုဆိုရန် ပတ္တယားမြို့က ပြင်ဆင်လျက်ရှိကြောင်း ထိုင်းသတင်းများတွင် ဖော်ပြသည်။ ထိုင်းတာဝန်ရှိသူများ၏ ထုတ်ပြန်ချက်အရ တပ်ဖွဲ့ဝင် ၅,၀၀၀ နီးပါး တင်ဆောင်လာသည့် စစ်သင်္ဘော ၃ စီးပါ အဆိုပါအုပ်စုသည် စက်တင်ဘာလ ၂ ရက်မှ ၆ ရက်နေ့အထိ လမ်ချဘမ်း ဆိပ်ကမ်းသို့ ဆိုက်ကပ်ရန် လျာထားကြောင်း သိရသည်။ ခရီးစဉ်သည် တပ်ဖွဲ့ဝင်များ ခေတ္တနားခို အနားယူရန်နှင့် သင်္ဘောများအတွက် ရိက္ခာအထောက်အပံ့များ ဖြည့်တင်းရန် အတွက်သာ ဖြစ်ပြီး၊ ထိုင်းနိုင်ငံနှင့် ပူးပေါင်းစစ်ရေးလေ့ကျင့်မည် မဟုတ်ကြောင်း ထိုင်းရေတပ်က ပြောထားသည်။ တာဝန်ထမ်းဆောင်ချိန် ရှည်ကြာခဲ့ပြီးနောက် အပန်းဖြေစခန်းမြို့ဖြစ်သော ပတ္တယားတွင် လာရောက်နားခို အနားယူကြမည့် အမေရိကန် စစ်သည်များကို ကြိုဆိုရန် မြို့တော်အနေဖြင့် အသင့်ဖြစ်နေပြီဟု ပတ္တယားမြို့တော်ဝန် Poramet Ngampichet ကလည်း ပြောသည်။ ယခင်ကလည်း အမေရိကန် စစ်သင်္ဘောများ ထိုင်းနိုင်ငံ အရှေ့ဘက် ကမ်းရိုးတန်းသို့ လာရောက်ချိန်တွင် ပတ္တယားမြို့မှ အမေရိကန် စစ်သည်များကို ကြိုဆိုခဲ့ဖူးကြောင်း ၎င်းက ဆိုသည်။ စစ်သည်တဦးလျှင် ဘတ် ၁,၀၀၀ မှ ၃,၀၀၀ အထိ သုံးစွဲမည်ဟု ခန့်မှန်းတွက်ချက်မှုအပေါ် အခြေခံ၍ တပ်ဖွဲ့ဝင် ၅,၀၀၀ စလုံး ကမ်းပေါ်တက်ခွင့်ရပြီး ပတ္တယားတွင် သုံးစွဲခဲ့ပါက ဒေသတွင်း သုံးစွဲမှု ဘတ် ၅ သန်းမှ ၁၅ သန်းအထိ ထွက်ပေါ်လာနိုင်မည်ဟု ခန့်မှန်းထားသည်။

မင်းအောင်လှိုင်ခရီးစဉ်ကြောင့် ထိုင်းအစိုးရ ဝေဖန်ခံနေရ (ရုပ်/သံ) ဧရာဝတီ၊ ဩဂုတ် ၇၊ ၂၀၂၆ မြန်မာအာဏာသိမ်းခေါင်းဆောင်ရဲ့ ထိုင်းနိုင်ငံခရီးစဉ်နဲ့ ပတ်သက်ပြီး ပြည်သူတွေအတွက် ဘယ်လိုအကျိုးကျေးဇူးတွေ တကယ်ရရှိမလဲဆိုတာ ထိုင်းနိုင်ငံရေးသမားတွေနဲ့ အရပ်ဘက်အဖွဲ့အစည်းတွေကြားမှာ မေးခွန်းထုတ်မှုတွေ ရှိနေပါတယ်။ ခရီးစဉ်မတိုင်ခင်မှာ ထိုင်းဝန်ကြီးချုပ် အနုတင်က နယ်စပ် ဖြတ်ကျော် မြစ်ရေညစ်ညမ်းမှုပြဿနာကို အဓိကထား ဆွေးနွေးမယ်လို့ ဆိုခဲ့ပေမယ့် လက်တွေ့မှာတော့ အားရစရာမရှိဘူးလို့ ပညာရှင်တွေက ဝေဖန်ကြပါတယ်။ တွေ့ဆုံမှုအပြီး ထွက်ပေါ်လာတဲ့ ပူးပေါင်းဆောင်ရွက်ရေး မူဘောင်တွေဟာ ပြဿနာရဲ့ အရင်းအမြစ်ကို ထိထိရောက်ရောက် ဖြေရှင်းဖို့ထက် ရှောင်လွှဲထားတဲ့ ပုံစံမျိုးသာ တွေ့ရတယ်လို့ မယ့်ဖာလုံတက္ကသိုလ်က ပညာရှင် ဒေါက်တာ ဆွပ်ဆကွန် ကစ်နုကွန်က ဧရာဝတီကို သုံးသပ်ပြောပါတယ်။ ဒါ့အပြင် မြန်မာနိုင်ငံနဲ့ ပတ်သက်လို့ အစဉ်တစိုက် ထောက်ပြပြောဆိုနေခဲ့တဲ့ ထိုင်းလွှတ်တော်အမတ်ဟောင်း ကန်နဝီ ဆူဝပ်ဆန်ကလည်း မြန်မာ အာဏာသိမ်းခေါင်းဆောင်ရဲ့ထိုင်းခရီးစဉ်မှာ ထိုင်းဘက်က မျှော်လင့်ချက်တွေပဲရလိုက်ပြီး ဘာကတိကဝတ်မှမရလိုက်ဘူးလို့ ဒီကနေ့ ဩဂုတ်လ ၇ ရက်နေ့မှာ ဝေဖန်ထားပါတယ်။ Ссылка скрыта #မြန်မာ #ဧရာဝတီ #ထိုင်း #မင်းအောင်လှိုင် #WhatsHappensInMyanmar

ဒေါ်အောင်ဆန်းစုကြည် ထိုင်းခရီးစဉ်နဲ့ မင်းအောင်လှိုင် ခရီးစဉ် ဘာကွာလဲ (ရုပ်/သံ) ဧရာဝတီ၊ ဩဂုတ် ၇၊ ၂၀၂၆ မြန်မာအာဏာသိမ်းခေါင်းဆောင် မင်းအောင်လှိုင်ရဲ့ ထိုင်းနိုင်ငံခရီးစဉ်အတွင်းမှာ ကောဇောနီခင်းပြီး တရားဝင်အဆင့်အတန်းနဲ့ ကြိုဆိုခဲ့တာတွေ၊ ထိုင်းဝန်ကြီးချုပ် အနုတင်ကိုယ်တိုင် တည်ခင်းဧည့်ခံတဲ့ ဂုဏ်ပြုညစာစားပွဲတွေအကြောင်းကို အာဏာသိမ်း အစိုးရထိန်းချုပ်ထားတဲ့ ဝါဒဖြန့်မီဒီယာတွေမှာ အကျယ်တဝင့် မြိုင်မြိုင်ဆိုင်ဆိုင် ဖော်ပြနေကြပါတယ်။ ဒါပေမဲ့ ဒီစာမျက်နှာတွေရဲ့ တဖက်မှာတော့ စစ်ခေါင်းဆောင်ကို အခုလို ခမ်းခမ်းနားနား ဖိတ်ခေါ်ကြိုဆိုခဲ့တဲ့အတွက် ထိုင်းအစိုးရအနေနဲ့ မြန်မာပြည်သူတွေသာမက၊ ထိုင်းနိုင်ငံသားတွေနဲ့ နိုင်ငံရေးတက်ကြွလှုပ်ရှားသူတွေရဲ့ ပြင်းပြင်းထန်ထန် ဝေဖန်ကန့်ကွက်မှုတွေကို ရင်ဆိုင်နေရတာပါ။ အခု အာဏာသိမ်းစစ်ခေါင်းဆောင်ရဲ့ ခရီးစဉ်ကို ကြည့်မယ်ဆိုရင် အရင်က လူထုခေါင်းဆောင် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် ထိုင်းနိုင်ငံကို လာရောက်ခဲ့စဉ်က အခြေအနေတွေနဲ့ အတော်လေးကို ကွာခြားနေတာ တွေ့ရပါတယ်။ ဒေါ်အောင်ဆန်းစုကြည် ၂၀၁၆ ခုနှစ် ထိုင်းနိုင်ငံကို လာရောက်ခဲ့စဉ်က ထိုင်းတနိုင်ငံလုံးမှာရှိတဲ့ မြန်မာရွှေ့ပြောင်းလုပ်သားတွေဟာ အလုပ်ဖွင့်ရက် ဖြစ်ပေမယ့် ခွင့်တွေယူပြီး တခဲနက် လာရောက်ကြိုဆို ခဲ့ကြတာပါ။ တချို့ ထိုင်းစက်ရုံတွေဆိုရင် အလုပ်သမားတွေ ဒေါ်အောင်ဆန်းစုကြည်နဲ့ တွေ့နိုင်ဖို့ ကားတွေတောင် စီစဉ်ပေးခဲ့ကြတယ်လို့ ဒေသခံလုပ်သားတွေက ပြန်ပြောင်းပြောပြကြပါတယ်။ လက်ရှိမှာတော့ ဒေါ်အောင်ဆန်းစုကြည်ဟာ နေပြည်တော်မှာ ဖမ်းဆီးထိန်းသိမ်းခံထားရဆဲ ဖြစ်ပေမယ့် သူလာစဉ်က ရရှိခဲ့တဲ့ လူထုရဲ့ နွေးထွေးတဲ့ ကြိုဆိုမှုကတော့ အခု စစ်ခေါင်းဆောင်ရဲ့ ခရီးစဉ်နဲ့ လုံးဝကို ဆန့်ကျင်ဘက် ဖြစ်နေတာတွေ့ရပါတယ်။ Ссылка скрыта #မြန်မာ #ဧရာဝတီ #ဒေါ်အောင်ဆန်းစုကြည် #မင်းအောင်လှိုင် #ထိုင်း #WhatsHappensInMyanmar

လက်နက်ကိုင်အဖွဲ့အစည်းများနှင့်နီးစပ်သည့် မြဝတီမြို့ခံတဦးကလည်း “မြဝတီတောင်ဘက် ဖလူးဆိုက်က တရုတ် တွေကို မြဝတီမြောက်ဘက် ရွှေကုက္ကိုတို့ သစ်ကတေဘက်တို့ကို စစ်တပ်က သယ်ပေးတာဖြစ်တယ်။ လေးကေ့ကော် မှာ ထိုင်နေတဲ့ စကခ ၁၃ ဗျူဟာမှူးက အတော်ရမှာ KK Park ရွှေ့တုန်းက တရုတ်တယောက်ကို ဘတ် ၃ သိန်း အနည်းလေး ဈေးပေါက်ခဲ့တော့ အခုလည်း တယောက် ဘတ် ၁ သိန်းနဲ့ပဲတွက်ရင် ဘတ်သန်းရာချီ ရနေပြီ”ဟု တွက်ချက်ပြသည် ... Website တွင် ဖတ်ရန် Ссылка скрыта