🔒Открыть пост
и посмотреть медиа
и посмотреть медиа
ምናለ ቢነግሩሽ
ከእኚያ ከሼሁ ጋር : ቁራን ስታቀሪ
ምናለ ቢነግሩሽ
ስለፍቅርና : ስለ'እንደኔ' አፍቃሪ
እኚያ ጓደኞችሽ : የከበቡሽ ሁሉ
ምናለ ቢነግሩሽ
ይሄ ልጅ ያይሻል : ወዶሻል እያሉ
እነዛ ዱካወች : በእግርሽ ያተምሻቸው
እነዛ እርምጃዎች : በጎኔ ያለፍሻቸው
ምናለ ቢነግሩሽ
ባንቺ መባከኔን : ላንዴ አፍ ኖሯቸው
አንዳንዴማ ሳስብ
ምነው ንብ ባረገኝ : እሷን ደሞ አበባ
ቀስሜያት በርሬ : ከቤቴ እንድገባ
ለክፈሽኛል መሰል : ድንገት አጊኝተሽኝ
ስትወጪም ስትገቢም : ጠባቂሽ አረግሽኝ
ስትወጪም አለሁ : ስትገቢም አለሁ
ከደጃፍሽ ደጃፍ : ከቶ መች ተለየሁ
ተቀምጬ እየዋልኩ : ተቀምጬ አመሸሁ
አንቺን አገኝ ብየ : ከራሴ እየሸሸሁ
እኚህ ጓደኞቼ : እኚህ የከበቡኝ
ምናለ ቢነግሩሽ
አንቺን እንዳናግር : እንደሚያዋክቡኝ
እግሬና አንደበቴ : ተስማምተው ላንድአፍታ
ምናለ ቢነግሩሽ
ልቤ አንቺን እያለ : እንደነሳኝ ፋታ
እግሬም አቅም ቢያገኝ : እንደው በጀገነ
ምናለ ቢነግርሽ
ቃላትን አውጥቶ : አፌም አፍ በሆነ
እንዳላናግርሽ : አቅም አጣሁና
እንዳላማክርሽ : ድፍረቴ ጠፋና
ቁጭ እንዳልኩኝ ቀረሁ
ዝም እንዳልኩኝ ቀረሁ : ዘንድሮም እንዳምና
(ድንገት ቀልቤ ቀርቦኝ
ድፍረቴን ሰብስቤ : ስምሽን ብጠራሽም
ዘግተሽኝ አልፈሻል : ወይ አልተሰማሽም
ሰምተሽኛል አልል
ድምፄን አላመንኩት : ካንቺ ለመድረሱ
አልሰማሽም አልል
ስምሽን ስጣራ : ዞረሻል በስሱ)
ቆይ አዳምጪኝማ
አንቺን አገኝ ብየ : ቁጭ ብየ ባለሁ
ለአልፎሂያጅ በሙሉ : ምልክት ሆኛለሁ
ቀርቤ እንዳልነግርሽ : በሰው ተከበሻል
መቼም
አሻግሬ ሳይሽ : መልክቴ ደርሶሻል
'አላወኩም' አትበይ : ጡር ይሆንብሻል
ስለምንሽ እቱ : ስለምንሽ ውዴ
ሙይልኝ ድፍረቴን : ላናግርሽ እስኪ አንዴ
እድሉን ብትሸጪኝ
(እኔም ድፍረት ባገኝ) : ይሄን እልሻለሁ
ብዙ አልናገርም : ብቻ እወድሻለሁ
ከላይ የፃፍኩልሽ
የተወናበደው : የምስኪን ሰው ግጥም
አፈርኩሽ እያለ : ወደድኩሽ ሚል አንድም
ምናለ ቢነግርሽ
የማፍቀሬን ልኬት : የመውደዴን አቅም
በአቤኒ የተፃፈ
@yilo15
@bravegenbyyil
