Brave Generation - мотивация

ጀምሮ ጨራሽ ነኝ? (የራስ-በራስ ግምገማ መጠይቅ) ከዚህ በታች ያሉትን ጥያቄዎች እንዲሆን ከምትመኘው አንጻር ሳይሆን ከወቅቱን አመለካከትህና ልምምድህ አንጻር ለመመለስ ሞክር፡፡ 1. አንድን ነገር ከመጀመርህ በፊት እንደሚያዛልቅህ በሚገባ አስበህ የመጀመር ልማድህን ከአስር ስንት ትሰጠዋለህ? 2. ለምታደርገው ለማንኛውም ነገር የቀን ገደብ የማስቀመጥ ልምምድህን ከአስር ስንት ትሰጠዋለህ? 3. አንድን ነገረ ለማከናወን ከወሰንክ በኋላ ለሌላ ጊዜ ሳታስተላልፍ የመቀጠልህን ልማድ ከአስር ስንት ትሰጠዋለህ? 4. ማንኛውንም አደራ ከመቀበልህ በፊት በጉዳዩ ላይ በሚገባ የማሰብህን ልምምድ ከአስር ስንት ትሰጠዋለህ? 5. የጀመርከውን ነገር የማትቀጥለው ከሆነ ጉዳዩ ለሚመለከታቸውና ለሚነካቸው ሰዎች የማሳወቅ ልማድህን ከአስር ስንት ትሰጠዋለህ? 6. ሰዎች አደርገዋለሁ ያሉትን ነገር ማድረግ አለባቸው፣ የጀምሩትንም ነገር ማቋረጥ የለባቸውም የሚለውን እምነትህን ከአስር ስንት ትሰጠዋለህ? 7. አንድ ጊዜ አምነህ የጀመርከውን ነገር “ሙዱ” ቢኖርህም ባይኖህም የመቀጠልህን ልምምድ ከአስር ስንት ትሰጠዋለህ? 8. የምታደርገው ነገር በታቀደለት ጊዜና የጥራት ደረጃ ስለመጠናቀቁ ጉዳይ ያለህን ትጋትና ጥረት ከአስር ስንት ትሰጠዋለህ? 9. በአካባቢህ ካሉ ሰዎች ጋር ሲነጻጸር ያለህን የጊዜ አጠቃቀም ብቃትና ስራን ለማጠናቀቅ ያለህን ትኩረት ከአስር ስንት ትሰጠዋለህ? 10. “በሃገራችን ካሉብን ችግሮች አንዱ ነገሮችን የማንጓተትና ያለመጠናቀቅ ነው” የሚለውን ሃሳብ ትክክለኛነት አረጋግጥ ብትባል ለሃሳቡ ትክክለኛነት ከአስር ስንት ትሰጠዋለህ? ለእያንዳንዶቹ ጥያቄዎች የሰጠሃቸውን የመልስ ቁጥሮች ደምራቸውና ያገኘኸውን ውጤት ከዚህ በታች ባለው መፍቻ ፍታው . . . • ውጤትህ ከ10 እስከ 25 ከሆነ አንድ ነገር ጀምሮ የመጨረስ ልማድህ አናሳ እንደሆነ አመልካች ነውና በሚገባ አስብበት፡፡ • ውጤትህ ከ26 እስከ 60 ከሆነ አንድ ነገር ጀምሮ የመጨረስ ልማድህ መካከለኛ ነውና ለማሻሻል ጥረት አድርግ፡፡ • ውጤትህ ከ60 እስከ 100 ከሆነ አንድ ነገር ጀምሮ የመጨረስ ልማድህ ጥሩ ደረጃ ላይ ነውና በዚያው ለመቀጠልና የበለጠ ለማሻሻል ግፋበት፡፡ Yabuti

ፈጣሪ ርቦት ✍️ ገጣሚ እና ባለቅኔ ኤፍሬም ስዩም እግዚአብሔር በመንገድ ላይ...በመንገድ ላይ ፈጣሪን ሲመላለስ ከሩቅ አስተዋልኩት። ከስቶ ነበር። ፊቱ ገርጥቷል። ቁመተ ዘልአለም.. ፀጉሩ እንደጥጥ ስስ እና ነጭ ነበር፡፡ አንጀቱ ተጣብቋል። ባህር መሳይ ውሃ ቀለም ዓይኑ፡ ነዶ ያለቀ የከሰል ፍም መስሏል። ረጅም መንገድ ተጉዞ ነበር፡፡ የፈለገውን ግን አላገኘም። በእጁ እና በቃሉ በፈጠራት ምድር ላይ እንደ መፃተኛ ነበረ። በምድር ላይ በሚመለከተው ሁሉ ሃዘንተኛ ይመስላል። በሰዎች መሃል ሲመላለስ ሰዎችን ይወቃቸው እንጂ ሰዎች እሱን ልብ አላሉትም ነበር። ከኋላው ተከተልኩት፣ ከኋላው እጅግ በጣም እርቄ... ከኋላው እየተከተልኩት የማስተውለው የሰውን ልጅ አልነበረም፡፡ ፈጣሪን ነበር። የሰው ልጆች ሁሉ ፈጣሪ... የክርስቲያን እና የሙስሊሙን፤ የሴቶች እና የወንዶችን፤ የከሃዲያን እና የአማኞችን፤ የነጭ እና የጥቁሮችን፤ የእዚህን እና የዚያን አለም እሱን ነበረ።ከኋላው እየተከተልኩ፣ በገባበት እየገባሁ፣ የተጓዘባቸው ቦታዎችን እና ስፍራዎችን ልብ እያልኩ፣ ጸጉሩ የነጣውን፣ፊቱ የገረጣውን፣ አይኑ ጨረር እንባ የሚረጨውን፣ ከኋላ ሁኜ ስለምን ፊቱ ገረጣ? ስለምንስ ከዓይኑ የጨረር እንባዎች ይወድቃሉ? እንዴትስ የደከመው መሰለ? እያልኩ ተከተልኩት። ከኋላው ነበርኩ ወደ ቤተ-መቅደስ ገባ፡፡ ካህኑ ፊቱን መደ ህዝቡ መልሶ ቆሞ ነበር። ህዝቡን እየባረከ፡፡ እግዚኣብሔር በህዝቡና በካህኑ ፊት ቆመ... ከዓይኑ ጥግ ይወርድ የነበረው ጨረራማ እንባ ቤተ- መቅደሱን ከደነው፡፡ እሳት መሳይ በሆነ በእግዚአብሔርም እንባ መካከል ቆመው የነበሩ ካህናት እና ምእመናን በእንባው መሃል መቆማቸውን ልብ አላሉም፡፡ ፊቱን እዙሮ ከመቅደሱ ወጣ፡፡ ማለዳ ፀሃይ ልትወጣ ስትል የምትመስለውን ይመስል የነበረ ደረቱ ከቀደመው ይልቅ ገረጣ፡፡ እርሃብ ያሽነፈውን ሰው መሰለ። ደም ግባት በፊቱ አልነበረም፡፡ እናቱ የሞተችበት ልጅን የሚመስል ሃዘን በፊቱ ላይ ነበረ። መንገዱን ቀጠለ፡፡ ቀድሞ ከወጣበት ቤተ-መቅደስ አለፍ ብሎ ከሚገኝ "መስጊድ" ዘለቀ። ሰላቱን በሚያሰግደው “ኢማም” እና “በጀማው” መካከል ፈጣሪ ቆመ፡፡ ጥቂት ቆይቶ ተመልሶ ወጣ በመቅደሱ እንደነበረው በዚህም ገፅታው እንደዚያው ነበር፡፡ ፍፁም ሃዘንተኛ፡፡ ከቀደመው ይልቅ አሁንም ሃዘን በፊቱ ላይ ነበር፡፡ ከኋላው መከተሌን ቀጠልኩ፤ እርቄ ከኋላው... ከተወሰነ የደከመ ጉዞ በኋላ ወደ አንድ ሰፊ ምኩራብ ዘለቀ፡፡ የኢየሱሳዊያን ጉባዔ በዛ ነበር፡፡ ከመሃከላቸው ቆመ እዛው በቆመበት የሚያስደነግጥ ሁኔታ ሆነ፡፡ ማለቂያ የለሽ ቁመናው ዛለ፣ እግሩ ተብረከረከ፤ ወዲያው በጉልበቱ ታጥፎ በምኩራቡ ላይ ተንበረከከ፡፡ ሁኔታው በጦር ሜዳ ስም የለሽ በሆነ ወታደር ጉልበቱን በጦር ተመቶ የወደቀን ስመ-ጥር ጀግናን ይመስላል፡፡ ከወደቀበት ፈጥኖ ተነስቶ ወደ መውጫው አመራ....አረማመዱን ከርቀት አስተዋልኩት። ዘላለም የለሽ እግሩ "ያነክስ" ነበር። እዎን ከዚያ ሲወጣ ያነክስ ነበር፡፡ ከዓይኖቹ ይረጩ የነበሩት የሃዘን ጨረሮች እንደወንዝ ነበሩ፡፡ እያነከሰ ወደ ቤተ መንግስት አመራ፡፡ እየተንፏቀቀ ተመልሶ ወጣ። እየተንፏቀቀ ርዕሰ ብሄሩ መኖሪያ ወጣ፡፡ ከአንደበቱም ቃል ይስማም ነበር። "በዚህ ሁሉ ነገር ባዶ ነው!!" በማለት እያቃሰተ አዘገመ። በመንፏቀቁ የተጎዳ ጉልበቱ የቀለጠ ብዙ እሳት የጠገበ የተፈተነ ወርቅን ይመስል ነበር፡፡ ተከተልኩት። ከጥቂት የደከመ እርምጃ በኋላ ጎዳና ያደከማቸው መንገደኞች ሁሉ ሊመርጡት ከሚችሉት ረጅም ዋርካ ስር ከሚገኝ አለት ላይ አረፍ አለ። እዚህ አለት ስር የመቅደስ ደረት፣ የመስጊድ አንጀት ፣ በር የሚዘጋባቸው ቤት የለሽ ህፃናት፤ ወንዶች እና ሴቶች ቀን ቀን ያለእራፊ ጨርቅ የሚተኙበት እና የሚጠለሉበት ስፍራ ነው፡፡ እሱንም የቤተመንግስቱን ህግ እናስከብራለን የሚሉ ጭፍራዎች ካላሳደዱአቸው ነው፡፡ በዚያ ፈጣሪ ተቀመጠ፡፡ እውነትም ገፁ "እህል ከቀመሰ ዘመናት ያለፉትን ጎልማሳ" መስሏል፡፡ ስለምን መስሏል ? ሆኗል እንጂ፡፡ ርቄ ከኋላው እከተለው የነበርኩ በውስጤ ጥያቄ እየተመላለሰ ወደ ተቀመጠበት ተጠጋሁ ፈጣሪ እንዴት ሊራብ ይችላል? ሲርበው ምን ሊመገብ ይችላል? ሰማይ እና ምድርን በጣቱ የፈጠረ እሱ እንዴት ሊራብ ይችላል?? በባህር እና በምድር ያሉትን ፍጥረታትን የሰራ እሱ ምን ሊመገብ ይችላል??? እርሃብተኛ መስሎ በህዝቡ እና በአምልኮ ስፍራዎቻቸው የተመላለሰ ለእሱ ምን አይነት ምግብ ሊሰራ ይችላል? ከዋርካው ስር ከአለቱ ላይ የተቀመጠ ፈጣሪ ምን ቢርበው ይሆን ደረቱ የገረጣ? ፊቱ የጠወለገ? አንጀቱ የታጠፈ አይኑ የሰረጎደ መስሎ የሚታየው??? ይህንን በልቤ እየጠየቅሁ ርቄ ከጎኑ ተቀመጥኩ... አይኖቹን ወደ እኔ መለሰ፡ እኔ በውስጤ ጠፋሁ:: በውጪም አልነበርኩም። ገብቶ ካዘነባቸው ስፍራዎች በአንዱ ነበርኩና። ከዓይኑ ጥግ ወርዶ በጨረር ፍም ከሞላው ስፍራ። ከአንደበቱ "ቃል" ወጣ... "ስለምን ትከተለኛለህ"? አለኝ... "ለምድሪቱ እንግዳ ስለመሰልከኝ" አልኩ በፍርሃት በቸርነቱ በተለገሰችኝ ድፍረት። "አዎን እንግዳ ነኝ" ማረፊያ ያጣሁ ርሃብተኛ፡ ቁራሽ እቀምሰው ያጣሁ ምፅዋተኛ ነኝ... በፈጠርኩት ምድር ላይ እንግዳ ነኝ፡፡ እንዲህ አይነት ህይወትና መሬት በእጄ አልተፈጠረም፡፡ በአንደበቴም አልጸናም፡፡ ሁሉንም ዞሬ ጎበኘው። አለምን ሁሉ ቃኘሁ። ይህ አለም በእናንተ እንጂ በእኔ የተፈጠረ አይደለም። እኔ የሚያስፈልጋችሁን ሁሉ ፈጠርኩ፡፡ እናንተ ግን የማያስፈልጋችሁን ሁሉ መረጣችሁ። የመረጣችሁት እኔ የሰራሁት አይደለም፡ እናንተ የፈጠራችሁት እንጂ። እናንተ በፈጠራችሁት ግን እኔ "ርሃብተኛ" ሆንኩ። በድጋሚ ጠየቅኩ፡ ልቤ በውስጤ እየደነገጠ አይኑን እየሸሸሁ "አንተ የሚታይ እና የማይታየውን አለም የፈጠርክ ነህ። ሁሉ በእጅህ... ሁሉ በደጅህ ነው። ምግብን የፈጠርክ አንተ እንደምን ልትራብ ትችላለህ? " መልሼ ጠየቅሁ። ፈጥኖ መለሰልኝ፡፡ ጆሮዎቼ እንጂ አይኖቼ ከፊቱ ሸሽተው ነበር። @bravegenbyyil

በአንድ ወቅት አንድ ወጣት በጣም ቆንጅዬ ከሆነች ልጅ ፍቅር ይዞት ነበር ፡፡ ልጅቷ በጣም ቆንጆ እና የሚያምር ሰውነት ነበራት ፡፡ ወጣቱ በፍቅሯ ከተሸነፈ ቆይቷል ፡፡ እንድታፈቅረው ለማድረግ በጣም ብዙ ነገር ነበር የሚያደርግላት ፡፡ ቀሪ ሕይወቱን ከእሷ ጋር ስለማሳለፍ ማለም ብቻ ሆነው ስራው ፡፡ ይህ ሁሉ ሲሆን ግን አንድም ቀን ለሷ ያለውን ስሜት ገልፆላት አያውቅም ፡፡ ጓደኞቹ እንዲነገራት ብዙ ጊዜ አደፋፍረውታል “ስሜትህን ካለገለፅክላት እንደምትወድህ ወይም እንደማትወድክ በምን ታውቅና ነው ስለ እሷ ብዙ የምታስበው? ለሷ ይህን ሁሉ የምታደርገው? በመጀመሪያ ምን እንደሚሰማክ ንገራት ከዛ የሚሆነውን እናያለን ”፡፡ ከብዙ ምክርና ጭቅጭቅ በውኃላ ያ ትክክለኛ መንገድ እንደሆነ ተሰማው። ልጅቷ በተቃራኒው ከመጀመሪያው ጀምሮ ልጁ እንደሚወዳት ታውቅ ነበር ፡፡ ምንም ነገር ከሱ ካልመጣ ችግር የለውም ብላ ግንኝነታቸውን በተለመደው በኩል እንዲቀጥል አድረጋው ቆይታለች ፡፡ አንድ ቀን ግን ፈራ ተባ እያለ ስለሷ ምን እንደሚሰማው ነገራት ፡፡ ልጅቷ ግን የፍቅሩን ጥያቄ ውድቅ አደረገችው፡፡ ልጁ ያልጠበቀውና ያልተዘጋጀበት ነገር ስለነበር ከባድ ዱብ ዕዳ ሆነበት ፡፡ ከሱ ይልቅ ደግሞ ዜናውን በጉጉት ሲጠብቁ የነበሩት ጓደኞቹ ይበልጥ ደነገጠ። በነርሱ ግምት ልጅቷም ፍላጎት ይኖራታል ብለው አስበው ነበር፡፡ ጓደኛቸው ልጅቷን ምን ያህል እንደሚወዳት ስለሚያውቁ ያን አስደንጋጭ የሆነ መልስ ካገኘ በውሃላ ልጁ ሰው አይሆንም ብለው ብለው ገመቱ፡፡ በብስጭት አጉል ሱስ ውስጥ ይገባል ወይም እራሱን ይጎዳል የሚል ስጋት ገባቸው፡፡ ልጁ ምንም እንዳለተፈጠረ የእለት ተለት ስራውን ሲሰራ አገኙት፡፡ እንዴት እንዳላዘነ ሲጠይቁት እሱ መለሰ “ለምን መጥፎ ስሜት ይሰማኛል? እኔ የማይወደኝን ሰው አጣሁ ፤ እሷ ደግሞ በእውነት እሷን የሚወድ እና የሚንከባከባት አጣች ፡፡ ሕይወት ይቀጥላል” *** ያፈቀርነው ስው ሁሉ የኛ መሆን አለበት ብሎ የሙጢኝ ማለት እራስን ለጉዳት ይዳርጋል፡፡ ሰው ካፈቀረው ጋር የግድ መኖር አለበት? ምን ታስባላችሁ? @yilo15 @bravegenbyyil

If your actions inspire others to Dream more, Learn more, Do more and Become more, You are a LEADER. @yilo15 @bravegenbyyil

ወጣት ጡረተኞች! ሰዎች ረጅም እድሜ ከኖሩ፣ ከተማሩ፣ ከሰሩና የቻሉትን ያህል ከሮጡ በኋላ እድሜ ሲገፋ ወደ ጡረተኝነት ይሸጋገራሉ፡፡ ይህ የጡረተኝነት ዘመን ምንም እንኳን እንከን የሌለበት ሂደት ቢሆንምና የራሱ የሆነ ጣእም ቢኖረውም፣ ምናልባት የጡረተኝነትን ዘመን ትንሽ “ጎዶሎ” የሚያደርገው ጡረተኞቹ ከዚህ በፊት ራሳቸውን ችለው ማድረግ የሚችሉትን ነገር እቀነሱ የመሄዳቸው ጉዳይ ነው፡፡ ይህ የሚሆንበት ዋነኛ ምክንያት ቀድሞ የነበራቸው አቅም አሁን ስለማይኖራቸው ነው፡፡ አንዳንድ ጊዜ አንዳንድ ወጣቶች ገና በለጋነት እድሜያቸው “ጡረተኞች” ይሆናሉ፡፡ • ብዙ መስራት ስትችሉ ቁጭ ብላችሁ ጊዜያችሁን የምታሳልፉ ከሆነ፣ ወጣት ጡረተኛ ናችሁ፡፡ • ስለነገ አላማችሁና ራእያችሁ ከምታስቡትና ከምታቅዱት ይልቅ ቁጭ ብላችሁ ስለትናንትና ታሪካችሁ ስታስቡና ስትጸጸቱ የምትኖሩ ከሆነ፣ ወጣት ጡረተኛ ናችሁ፡፡ • አንድን ነገር የማድረግ ፍላጎቱና ምኞቱ እያላችሁ አቅም የማጣት ስሜት ከተጫጫናችሁ፣ ወጣት ጡረተኛ ናችሁ፡፡ • የመሻሻል አቅሙና ጤንነቱ እያላችሁ በየእለቱ እየተሻሻላችና ራሳችሁን ወደመቻል እያደጋችሁ ከመሄድ ይልቅ እየደከማችሁና የሰው ጥገኛ እየሆናችሁ ከሄዳችሁ፣ ወጣት ጡረተኛ ናችሁ፡፡ • አንድ ሰው ትኩረቱን፣ ጊዜውን ወይም አብሮነቱን ስለከለከላችሁ ብቻ መኖር እስከማትችሉ ድረስ ተስፋ እንደሌላችሁ ከተሰማችሁ፣ ወጣት ጡረተኛ ናችሁ፡፡ ይህንን የወጣትነት ዘመናችሁን በፍጹም እንደገና የማታገኙበት አመታቶች ሩቅ አይደሉምና ተነሱ! ተንቀሳቀሱ! አስቡ! አቅዱ! ስሩ! ከማንም ሰው ውጪ መኖር እንደምትችሉ ራሳችሁን በማሳመን በፈጣሪችሁ እርዳታ ራሳችሁን አሳድጉ እንጂ አትዳከሙ፡፡ ካሳለፋችኋቸው አመታቶቻችሁ ይልቅ ገና ያልኖራችሁባቸው አመታቶች ይበዛሉና ወደፊት እያያችሁ በብርታት ተራመዱ፡፡